Эль-Классико! Футбол тарихындағы ең қызықты кездесу. Қазан айының 7-сі күні ЛаЛиганың 7-турында кезекті "Эль-Классико" өтпек. Қызуқанды кездесуге барын салып дайындалып жүрсе де, қос клуб та оны мойындайтын емес.  Бапкерлер де, ойыншылар да ЛаЛиганың кезекті тур ойындары деп, жұртты сендіріп бағуда. Дегенмен, әлемдегі ең мықты қос клубтың ойынына дайындалмау мүмкін бе?!

Барса мен Реал бүкіл турнирді санағанда 252 рет кездесіпті. Демек, 7 қазанда 253-ойын болмақ. Кім жеңуі мүмкін? Ол - уақыт еншісінде. Осы орайда, командалардың құрамына сараптама жасап көрсек.

Чемпионат басталғанда "Реал"-дың ойыны жүрмеді. Болмайтын жерден ұпай жоғалтып, басты қарсыласы "Барсадан" 8 ұпайға қалып кетті. Әрі корольдік клубтың басты жұлдызы Роналду көңілсіз екенін мәлімдеген еді. Рас-өтірігін кім білсін, кейбір БАҚ бас бапкер Моуриньо мен Рамос арасында кикілжің туды деп хабарлады. Дегенмен, соңғы ойындарда мадридтік клуб өз қалпына толық келді деп айтуға болады. Роналду да үсті-үстіне голды топырлатып жатыр. Соңғы ойында Криштиану хет-трик жасап үлгерді. "Реалдың" құрамынан мін таба алмайсың. Қақпашы Касильяс өз деңгейінен түскен емес. Қорғаушылар Марсело, Коентрау, Пепе, Арбелоа - нағыз бабында. Тек Рамос ғана күмән тудырады. Оның орнын кез келген сәтте Варане басуға дайын. Оған қоса Альбиоль мен Карвалью да бар. Яғни, қорғаушыларда еш кемшілік жоқ. Ал, орталық алаңдағы ойыншылар бұрынғыға қарағанда анағұрлым жақсы. Хаби Алонсо, Хедира, Өзил, Ди Марияларға биыл Лука Модрич пен Эссьэн келіп қосылды. Кака болса, бұрынғы деңгейіне қайта оралып келе жатқандай. "Реалдың" ең кемшін соғатын тұсы - шабуыл. Роналду шабуылда ойнап жүрсе де, ол номиналді ортаман болып қала береді. Супер жұлдыз болғанына қарамастан, онда шабуылшылық инстинкті жоқ. Ал, Бензема мен Игуаин ортаңқол ойыншы. Бірде жақсы ойнаса, келесіде тепкен добы қиыс кетеді. Кальехон туралы жұмған аузымды ашпай-ақ қояйын. Моуриньо оны "Реалдың" сапында өз мектебінен шыққан ойыншы жоқ деген әңгімеден қашу үшін алаңға шығаратын секілді.

Маусым басталғалы "Барса" бір-ақ рет ұтылыпты. Оның өзінде Испания суперкубогінде, "Реалға" қарсы ойында есе жіберді. Әрі ЛаЛигада жүз пайыздық көрсеткішке ие. Ұзақ мерзімнен кейін жасыл алаңға "Эль Гуахо", Давид Вилья оралды. Алайда, "Барса"-ның бас ауыртар мәселесі жетерлік. Вальдес каталондық клуб сапындағы ең нашар ойнайтын футболшы. Әрдайым қателікке бой алдырып, қарсыластардың гол соғуына мүмкіндік беріп қояды. "Барселона" клубының басшыларына қақпашыны ауыстыру туралы ойлану керек. "Блаугрананың" ең кемшін түсетін тұсы - қорғаушылар. Жо-о-оқ! Дани Алвестер бабынан тайған жоқ әлі. Бас ауыртып тұрған мәселе - қос орталық қорғаушы Пике мен Пуйольдің жарақат алғаны. Соңғысы 7-8 ай бойы футболды трибунадан тамашалайды. Сол қанатта атойлап жүрген Адриану да жарақатынан айықпады. Әйтеуір, Хорди Альба сапқа қосылып, сол жақты іске қосты. Маскерана мен Сонг тәжірибелі ойыншы болса да, қорғаныста сауатты ойнай алмайды. Марк Бартраға мүмкіндік беру керек. Әлгі Фонтас, Муньеса әлі лазаретте. Ал, Монтояның тәжірибесі Алвесті ығыстырып шығуға жете қоймады. "Реалдағы" секілді "Барселонаның" орталық алаңы нағыз бабында тұр. Хави, Иньеста, Бускетс, Фабрегастар кез келген сәтте ойынға тың серпін әкеле алады. Өкінішке қарай, Тьяго тағы да жарақат алып қалды. Сірә, Мазиньоның ұлы жоғары классты ойыншы бола алмайтын секілді. Джовани дос Сантос та ағасының кебін киетіндей. Тек, Серджи Робертоның мүмкіндігі мол. Жалпы алып қарасаң, "Барселонаның" шабуылшыларының екеуінен басқасы жоғары деңгейлі емес. Месси мен Вилья бабынан таймаса, қақпашыларға әлі талай сан соқтырады. Айта кетерлік бір нәрсе, Месси инопланетян болса да, Роналдуға жетіспейтін сұрмергенге тән  инстинкт онда да жоқ.  Бұл жерде қос футболшыны төмендеткім келіп отырған жоқ. Айтқым келгені оларға Фалькао, Дрогба, ван Перси, Роналдоға тән мінез жетіспейді. Алексис тура Игуайн секілді. Ал, Педро болса, Бенземаның каталондық нұсқасы. Куенка жарақатынан айықпады. Тельо әр ойын сайын тәжірибесі артып келеді. Менің жеке пікірімше, Ла Масияның болашақ жұлдызы осы Тельо болмақ.

Құрамаға қарайтын болсақ "Реал"-дың күші басым екені айқын. Ал, психологиялық тұрғыдан "Барса" мығымдау. Өйткені олардың еншісінде артық 8 ұпай бар. Ойын "Ноу Кампта" өтетінін ескерсек, алаң иелерінің есе жіберуі екіталай. Менің ойымша тең ойын болатын секілді. Әуелі Реал гол салады, сосын Барселона есепті теңестіреді. Ойын соңына таман бір ойыншы алаңнан қуылуы мүмкін.

Енді, кішігірім статистика.

Ескерту: ИК - Испания кубогі, КЛ - Испан лигасының кубогы, СК - Испания суперкубогі, ЧЛ- чемпиондар лигасы, УК- УЕФА кубогі, КК - кубок иелерінің кубогі, СУ - УЕФА суперкубогі, ӘЧ - клубтар арасындағы әлем чемпионаты. Менің пікірімше командалар төмендегі құраммен алаңға шығады.